Fréttir

Myndlistarsýning á verkum Jerémy Pailler, sem skreyta barnabókina Vetrardagur í Glaumbæ, hefur verið sett upp í Safnahúsi Skagfirðinga. Sýningin er á báðum hæðum hússins, framan við Héraðsskjalasafn Skagfirðinga og Héraðsbókasafn Skagfirðinga. Myndirnar, sem unnar eru úr bleki og vatnslitum á pappír, eru jafnframt til sölu og hægt að festa kaup á þeim á staðnum.

Á miðvikudagskvöldið í síðustu viku heimsóttu fjórir rithöfundar bókasafnið. Kynntu þau nýútkomnar bækur sínar og lásu upp úr þeim. Fjöldi gesta mætti á þennan viðburð og var gerður góður rómur að hinum nýju bókum. Að venju var svo boðið upp á kaffi, konfekt og jólate.

Fjórir rithöfundar munu heimsækja bókasafnið á miðvikudagskvöldið í næstu viku, þann 15. nóvember. Þá verður hið árlega rithöfundakvöld haldið og stendur dagskráin frá kl 20-22. Munu höfundarnir allir lesa úr nýútkomnum bókum sínum. Aðgangur er ókeypis og boðið upp á kaffi, konfekt og jólate í hléi.